Preassagovva: Sámi beassášmárkanat / Sami Easterfestival

Guovdageainnu beassášmárkanat

Lea veadjetmeahttun ovtta artihkkaliin muitalit čiekŋalit Guovdageainnu beassášmárkaniid. Prográmma lea spaggadievva smávit ja stuorát dáhpáhusain, sihke mánáide ja ollesolbmuide. Mii leat geahčastan prográmma.

Guovdageainnu beassášfestivála konsearta prográmma álgá gaskavahku rahpankonsearttain Juhls silbarávddis Anthoni Hættain ja Inger Márjá Nilutiin. Soai heiveheaba oktii árbevirolaš luođi ja klassihkalaš musihka. Gaskavahku lea maid nuvttá konsearta ja JAM nuoraidviesus. Nils Henrik Buljo čuojaha eahkedis Alfreds Kroas.

Skilleduorastaga leages árbevirolaš juoigankonsearta gos Sámi Grand Prix 2018 vuoiti Hans Ole Eira juoiga fárrolágaid earáiguin. Skilleduorastaga lea maid Niko Valkeapää lávddis Diehtosiiddas. Son ovdanbuktá ođđa ja boares lávlagiid ja almmuha ođđa skearru ”Gáldu”. Maŋŋel dán, de lea juoiganJAM Báktehárjji kaféas. Mikrofuvdna ja lávdi lea luođi váras. Sámi Funk Brigade čuojaha ges Alfredskroas.

Guhkesbearjadaga konsearttat álget juo diibmu 1600 Báktehárjjis. Dalle lea mánáid juoigankonsearta ja Binnabánnaš ge boahtá konsertii. Eahkedis lea Sančuari váldoartista Báktehárjjis. Maiddái Ivan Buljo, DJ Ailo ja DJkollektiiva Article 3 Christina Hættain, Elle Márjá Eirain, Sunna Nousuniemin ja Anne Henriette Nilutin čuojahit Báktehárjjis. Rolffa & GM leat Alfreds kroas.

Ovdal Sámi Grand Prix beassášlávvardaga de lea klassihkalaš konsearta Juhlsas. Sámi Grand Prix lágiduvvo árbevirolaččat Báktehárjjis ja dán háve ávvudit 30 jagi. Grand Prix streamejuvvo NRK:s

Eahkedis lea Báktehárjjis konsearta Inger Karoline Gaupain, Akkilin, DJkollektiivvain Article 3 ja stuorámus dáhpáhus dán eahkeda lea varra go Stjernekamp vuoiti Ella Marie Hætta Isaksen ja ISÁK lávke lávdái. Joavku lea áiddo almmuhan skearru “Ealán”. Alfredskroas čuojaha Jan Ole Hermansen joavkkuinis.

Guovdageainnus diehtelas lea dánge jagi olu olgodoalut. Skilleduorastaga rájes leat duodjemárkanat olggobealde Báktehárjji. Oaggungilvvut Suohpatjávrris lágiduvvojit skilleduorastaga ja dát doalut geasuhit čuohteneare olbmot. Guhkesbearjadaga lea muohtavolleyballgilvvu ja gáfestallan Guovdageainnu šalddi luhtte. Beassášcrossa Loaŋkosáttus lágiduvvojit ges guhkesbearjadaga ja beaivválaččat beasat herggiin vuodjit.

Mázes leat oaggungilvvut beassášlávvardaga.

Čájálmasat ge leat olu. Dánsačájálmas Kill a Cat Show guorahallá dan heajos oktavuođa gaskal seksualitehta, fámu ja ruđaid mat ráhkadit nissonolbmo gálvun. Čájálmasa oainnát vuossárgga LES viesus.

Sámi Našunálateáhter lea dan jagi maid mielde beassášmárkaniin. Gaskavahku beassat Pelle Njoammilin oahpasnuvvat go bihtás lea vuosttaščájálmas. Čálli ja neavttár Sven Henriksen maid galleda Beaivváža guhkesbearjadaga iežas čájálmasain “Doal’al njálmmi, Henriksen”. Gos muitala eallima buriid ja baháid.

Vuosttašbeassášbeaivvi lea fas teáhter, dál ges Abrahama mánát, mii čieža jagi dassái šattai Norgga buoremus čájálmassan.

Maiddái Sámi Joatkka- ja Boazodoalloskuvllas lea čájálmas, namalassii guhkesbearjadaga. Dalle oaidnit “Aindás” mii lea sámi vuosttaš hiphop čájálmas Ánna Katri Helanderin.

Duodjeinstituhta vuovdinčájáhusat čájehit duoji hárjánan ja ođđa duojáriin. Čájáhusrahpan lea vuossárgga.

Dáiddačájáhusat eaige váillu. Vuossárgga rahpá Gilišillju čájáhusa dávviriin mat leat máhcahuvvon Norgga Álbmotmuseas. Seamma beaivvi rahppo Duodjesiiddas čájáhusa mii guorahallá čiŋat doahpaga. Beassat oaidnit Anita Schmid, Ari Pyörälä, Jens A. Clausen, Peter Rust ja Philipp Spillmann diŋggaid. Diehtosiiddas čájeha Koji TSUDA iežas govaid gaskavahku rájes. Jápanalaš lea johtán Sámis gaskkal 1974-1986 ja lea govven sihke olbmuid eallimis ja guovssahasa.

Dáiddadálus beasat ges SápmiToo čájáhusa vásihit mas oassálastet dáiddárat Máret Ánne Sara, Hilde Skancke Pedersen ja Susanne Hætta. Sii gieđahallat seksuála illásteami, veahkaválddálašvuođa ja sohkabealrollaid. Norgga kulturministtar Trine Skei Grande rahppá čájáhusa skilleduorastaga, musihkka Anthoni Hætta bokte ja Elle Sofe Saras lea vuosttaš čájáhus filmmas ”Giitu giitu” mas lea sáhka læstadianalaš lihkadusain.

Ja jus dárbbašat veahá dánssaveahki, de skilleduorastaga Diehtosiiddas fállet Sámi ofelaččat kurssa oarjándánsakurssa buohkaide geat háliidit dánsesit beassášfestiválas.

Gáldu: Guovdageainnu Beassáš-márkanat prográmma ja magasiidna.