Mannan vahku oaččui Synnøve Persen kulturráđi ánsobálkkašumi.

Gudnejahttojuvvon

Ledje stuorra doalut, go sámi stuorámus dáiddár Synnøve Persen vuostáiválddii kulturráđi 2018 ánsobálkkašumi máŋgga jagi barggu ovddas dáiddárin ja diktačállin.

– Dát bálkkašupmi lea okta Norgga stuorámus bálkkašumiin, sihke ruđalaččat ja ánssu bealis. Dieđusge lean rámis. Ruhtalátna addá earret eará vejolašvuođaid jođašit ovdamearkka dihte festiválaide, mat mearkkašit olu dáiddalaččat ja addá munnje stuorát friddjavuođa dáiddárin máŋgga dáfus. Das leat nu olu mearkkašumit. Beasan maid návddašit dáiddáreallima áibbas eará láhkái. Lean issoras giitevaš, lohká gudnejahttojuvvon dáiddár Synnøve Persen. 

Kulturráđis muitalit, ahte Persen oažžu bálkkašumi iežas dáiddalaš bargguid geažil sihke nationála ja riikkaidgaskasaš dásis ja buot dan barggu dihte, maid lea dahkan sámi dáidaga, giela ja identitehta ovdii.

Persena gudnejahtte iešguđetge olbmot lávddis, earret eará OCA - Office for Contemporary Art Norway - direktevra Katya García-Antón, gii logai Persena dáidaga leamaš varrasuotnan sidjiide geat dorro, gahčče ja cevze.

Sámi dáiddačehpiid searvvi jođiheaddji Hilde Skancke Pedersen ges logai Persena dáidaga ja poesiija olahan máilmmi, ja ahte Persen áŋgiruššan Álttá akšuvnnas nannii sámi servodathuksema ja lei mielde Norgga dahkame girjábun ja olmmošlabbo riikan.


Sámedigge preassegovva.

Sámediggepresideanta Aili Keskitalo válddáhalai stuora gudnin olles sámi álbmogii, go Synnøvii geigejuvvo bálkkašupmi. Son máinnašii maid sámi servodagaid dárbbašit nana olbmuid, geat eai garvve maidege, go dolvvodit sámi ovddasguvlui.

Ánsobálkkašupmi geigejuvvui Synnøve Persenii Norgga nationálagalleriijas, Oslos.