Sámedikki presideanta Aili Keskitalo ja direktevra Rune Fjellheim searvvaiga doaluide gudnejahttin dihte Grand Chief Wilton Littlechild, guhte lea Cree álbmoga oaivámuš ja dovddus álgoálbmot jođiheaddji. Govva : Sámediggi.

Gudnejahtiiga Cree álbmoga oaivámuša

Sámediggepresideanta ja direktevra gudnejahtiiga Cree álbmoga oaivámuša ja dovddus álgoálbmot jođiheaddji New Yorkas.

Sámedikkipresideanta Aili Keskitalo ja direktevra Rune Fjellheim leaba máŋggaid eará sápmelaččaid láhkai dál New Yorkas čuovvumin ON Eamiálbmogiid bistevaš foruma čoahkkima. 

Árat dán vahku soai searvvaiga maid doaluide, main gudnejahtte Grand Chief Wilton Littlechild, guhte lea Cree álbmoga oaivámuš ja dovddus álgoálbmotjođiheaddji. Son lea álgoálbmotrivttiid ovddas bargan olles eallinagis. Kanada ON-ambassáda lágidii gudnejahttindoaluid Grand Chief Wilton Littlechild nammii ON álgoálbmotáššiid bistevaš foruma (UNPFII) oktavuođas, čállá Sámediggi iežas neahttasiiddus. 

ON Eamiálbmot bistevašforum lea áđđeaddiorgána mas lea mandáhta rávvet ja ávžžuhit Ovttastuvvon našuvnnaid eamiálbmotáššiin. Dán jagi lea árbevirolaš máhttu fáddán Eamiálbmogiid bistevaš forumis. Maiddái ON riikkaidgaskasaš eamiálbmogiid giellajahki lea fáddán. Čoahkkin álggahuvvui nuppi beassášbeaivve ja bistá miessemánu 3. beaivvi rádjai.