Preassagovva: Per Heimly
Preassagovva: Aslak Mikal Mienna

– Go sánit eai leat šat, de ferte juoiggastit

Sámi Našunálateáhter Beaivváš álggaha ođđa jagi luđiiguin ja bovde JUOIGGAS-konseartačájálmasain teáhtergehččiid mielde musihkalaš mátkái miehtá Sámi. 

Bearjadaga guoimmuhit neavttárat ja juoigit Mary Sarre, Iŋgor Ántte Áilu Gaup, Nils Henrik Buljo ja Egil Keskitalo, ja vel čuojaheaddjit, Riksscenen-lávddis Oslos. Doppe Beaivvážis lea álgočájálmas JUOIGGAS-bihtás, mii lea riegádan Rawdna Carita Eira ja Harald Gaski čállosiid vuođul, maid teáhterhoavda Rolf Degerlund lea bagadallama olis čatnan oktii.

 JUOIGGAS čájehuvvo vel ođđajagimánu 19. beaivvi ja das maŋŋá Sámi Našunálateáhter Beaivváš dolle juoiganmátkái miehtá Sámi.

Konseartačájálmasain Sámi Našunálateáhter Beaivváš guorrá luohtehistorjjá ja juoigama áiggiid čađa. Beassat gullát go muhtin juoiggasta muhtima, beassat diehtit mo dajahallan bekkii 1600-logu loahpageahčen Eurohpás ja movt dat movttiidahtii diktačálliid.

Juoigit ovdanbuktet luđiid iešguđet áiggiin – bivdorituálaid rájes 6000 jagi dás ovdal gitta otnážii. 

– Luohti gullá Davvi-Eurohpá boarráseamos šuokŋamálliide ja dat lea seilon buolvvas bulvii máŋggaid duháhiid jagiid. Luohti lei Beaivvi nieidda myhtalaš skeaŋka sámiide, dainna sii dápme gottiid, čállá Beaivváš preassadieđáhusastis.