Govva: Marion Aslaksen Ravna

Geahčadišgohtet boazodoallolága

– Mii leat ilus dál go vuosttaš gearddi lea nammaduvvon sámi láhkalávdegoddi, lohkaba sámediggepresideanta Aili Keskitalo ja NBR jođiheaddji Ellinor Marita Jåma.

Lávdegottis mii galgá geahčadit olles boazodoallolága, leat dát olbmot mielde:

Ragnhild Marit Sara – lávdegotti jođiheaddji, jurista 

Kirsti Strøm Bull, professor, dr.juris

Samuel John N. Anti, boazodoalli 

Nils Per Jåma, boazodoalli 

Ellen Inga Turi, dutkan- ja oahppodirektevra, dr.philos 

Nils Mikkelsen Utsi, advokáhtta, sámediggeáirras ja boazodoalli 

Anna Ravna Gaup, boazodoalli 

Mattias Åhren, professor, dr. Juris 

Ellen Sara Sparrok, boazodoalli 

 Sámediggi ja Norgga Boazosápmelaččaid Riikkasearvi (NBR) leat nammadan láhkalávdegotti mii galgá geahčadit boazodoallolága. 

– Lávdegoddi galgá geahčadit siskkáldas áššiid boazodoalus, ja evttohit láhkarievdademiid mat sihkkarastet boazodoalu ja boazodoalu areálaid, lohká sámediggepresideanta Aili Keskitalo.

– Buorre livččii jus oažžut áibbas konkrehta ávžžuhusaid dasa movt láhka galggašii rievdaduvvot, go dat dagahivččii álkibun bargat Stuoradikki vuostá dárbbašlaš láhkarievdadanproseassaiguin, ávžžuha NBR jođiheaddji Ellinor Marita Jåma.