FM-fierpmádat lea jáddaduvvon, maid dál bargat?

SÁMi ođasmagasiidna válljii geahččalit Tiny Audio C5 dab-apparáhta, mii lea vuoitán «Lyd & bilde» iskkadeami.

Válljiimet ieža monteret ja geahččalit dan Mitsubishi Lancer 2016 modeallas. Healkkeheimmet gal vehá, go das ii lean gárvvisin biddjojuvvon DAB+.

Háliideimmet buohtastahttit FM ja DAB+ apparáhtaid, ja vujiimetge Kárášjogas Levdnjii ja ruovttoluotta, ja guldaleimmet vuos rádio FM-fierpmádagas, ja iskkaimet makkár kvaliteahtain P1-, P2- ja P3-kanálat gullojit. 

Maŋŋá vujiimet seammá gaskka ja guldaleimmet rádio DAB+ apparáhtain. Boađus lei nu mo leimme gáddán: DAB+ apparáhtain sátta gullui olles mátkki, sihke buot NRK DAB+ -kanálat ja ledje maid ollu eanet kanálat go FM-fierpmádagas. Ledje maid máŋga báikkálaš kanála Kárášjoga ja Leavnnja lagaš guovllus. Tiny Audio C5 doaimmai bures. Biilla rádioapparáhta dat mearrida makkár jietnakvaliteahtta gullo, nu ahte go jo ođđa biillas lea buorre rádio, de gullui jietna maid bures. Dan berret don maid váldit vuhtii, ahte biilla rádioapparáhta dat mearrida jietnakvaliteahta. Geahččaleimmet maid adaptera, maid čugge duhpátcahkkehanreidui, muhto dat gal lei nu heittot, ahte eat ávžžut dakkára gal oastit. 

Geahččaleami vuođul oaidnit ahte Tiny Audio C5 lea ollislaš čoavddus, mii gokčá DAB+ dárbbu ollásit. Maŋit beaivve geahččaleami maŋŋá badjánedje váttisvuođat anteannain, muhto gávnnaimet Radio.no -siiddus ráđi, njulgiimet kabeliid, maid leimmet giessan snurtun, ja dalle anteanna fas doaibmagođii. 

SÁMi ođasmagasiidna rávvege du, gii leat jurddašan bijahit iežat biilii DAB+: Geavat divohaga, gos máhttet áššiid ja mat oidnet du dárbbuid. Leat gal maiddái eará čovdosat, divraseamos lea oastit ollásit ođđa čuojanasa, dahje sáhtát oastit adapteriid, mat leat jogo oidnosis dahje čihkosis. Dat ii dattetge dárbbaš leat nu hirbmat divrras, ja doaibmá liikká bures. 

Emneord: