Duostatgo rahpat boares háviid?

Suoma stáhta mearridii mannan čavčča ásahit sápmelaččaid várás duohtavuođa- ja soabadankommišuvnna, mii galgá guorahallat ja čalmmustahttit vearredaguid, mat sin vuostá leat dahkkojuvvon, go boares vásáhusat ain váikkuhit ovttaskas olbmuide. Dat mearkkaša boares bávččas muittuid boltuma ja háviid rahpama.

Suoma stáhta bealis bargá erenoamáš áššedovdin Ánne Risten Juuso, gii dál ovttas čálliinis, Martta Alajärviin, johtá miehtá Suoma Sámi ja stuorimus gávpogiin ságastallamin olbmuiguin justa fal kommišuvnna ja dan dárbbu birra. Son vásiha ahte čoahkkimiid olis badjánit garra dovddut ja muitalusat, mat čuggejit váibmui. Su mielas olbmot leat gievrrat go dustet nu luohttevaččat ja rahpasit muitalit rašes áššiid birra.

Iigo dát jo duođaš ahte kommišuvdnii lea dárbu, ja ahte ii boađe beaivvige beare árrat? Dán rádjai Juuso lea gullan skuvla- ja ásodatáiggiid muitalusaid, muhto mas mii diehtit mii doppe vel sáhttá ihttit, go čiekŋaleappot roggat?

Muhto maid stáhta háliida dainna olahit? Leago jurddašuvvon buhtadus gillájeddjiide? Gal dat várra muhtinlágan jeđđehus livččii, go olbmot leat merkejuvvon agibeaivái, čiekŋalis hávit eai dáidde goassige savvut albma láhkai.

Duostatgo mii liikká boltut boares muittuid ja sevdnjes, rašes vásáhusaid oidnosii fas? Ja hállat daid birra? Gean gullot? Máŋgasiid ektui lea bargu maid álggahuvvon maŋŋit, go ollugat leat jo váldán lossa muittuideaset ja vásáhusaideaset mielde hávddiidasaset. Lea gal dieđus buoret beare maŋŋit, amma de lea ávkin daidda geat ain sáhttet searvat prosessii.

Máŋgasat sihkkarit maid oaivvildit ahte ii galgga heađisge boltugoahtit maidige. Ballet ahte mii duššiid dihtii buktit ovdan bákčasiiddámet, iige leat masage ávkin? Mun jurddašan ahte dušše dat ahte mii juogadit earáiguin dan mii lea leamaš bávččas ja lossat, sáhttá addit midjiide ođđa fámuid, oktiigullevašvuođa dovddu, fámuiduhttit min álbmogin.

Smiehtadan gal maid, ahte go vuos dákkár bargu lea biddjon johtui, de iigo sáhtáše hástalit ovttasbarggu kommišuvnnaid gaskka, riikkarájáid rastá? Máŋgga láhkaihan lea leamaš seammalágan dáruiduhttin/suomaiduhttin/ruoŧaiduhttin miehtá Sámi. Eaigo de stáhtat sáhtáše koordineret barggu juoga láhkai? Amma Sámedikkit sáhtášedje dása váikkuhit ja oažžut sadjái ovttasbarggu?

Sápmelaš ii leat gal dat, gii ovddemuš váidala dahje guhkkin eret hállá unohisvuođaid birra. Muhto dákkár proseassa veadjá leat hui ávkkálaš midjiide.

Emneord: