– Dronnegiin lei hui álki hupmat

Máret Ánne Sara beasai dronnet Sonjain deaivvadit gonagaslaš šloahtas. Máret Ánne beasai dronnegin ságastit dáidaga ja Jovsset Ánte duođalaš dili birra. – Orui nu issoras vuolgit šlohttii, muhto go de mieđustedje mu dronnega lusa ja mun bessen dearvvahit su, de oalggit gahčče.

ČÁLLÁN: Ánne Biret Anti

Sámi Ođasmagasiidna hálešta Máret Ánnen njuolgga maŋŋel go lea galledan šloahta. Sutnje ain dovdu jáhkitmeahttun ahte lea fitnan dronnet Sonja guossis.

– Sonja dovdui oba nanu nissonolmmožin. In dieđe vel áibbas sihkkarit makkár dovdu mus lea ja makkár jurdagat mus leat galledeames, muhto lei buorre sutnje hupmat. Ahte Dronnet guldala min, váldá min dili duođalaččat ja čájeha dan almmolaččat, lea mávssolaš. Dálkkoda dego veahá morraša ja addá čuovgga, muitala Máret Ánne.

Čálii reivve dronnegii

Ovdal juovllaid son bovdejuvvui oassálastit dronnet Sonja dáiddačájáhussii. Justa dalle lei Máret Ánne bearrašis hui lossa dili, go viellja vuoittáhalai Alimusrievttis ja Stuorradiggi doarjjui áitagiid baggonjuovvat masá olles su ealu, vaikko Jovsset Ánte lea guoddalan duomu Ovttastuvvon Našuvnnaid olmmošvuoigatvuođakommišuvdnii. 

Máret Ánne čálii lossa mielain reivve dronnegii ja bivddii hupmat dronnegin dáidaga ja Jovsset Ánte dilis. 

Dronnet logai Máret Ánne reivve ja válljii vuostáiváldit Máret Ánne šloahtas.

Loga dás maid Máret Ánne dáhtui čilget dáidagis ja vieljas áššis.

– Bessen guhká dronnega luhtte

Odne de gallediige Máret Ánne dronnega. Son beasai guhkit go plánejuvvon dronnegin ságastit.

 – Ain fitne skoalkkuheame uvssa, go munno ságastallan áigi lei áigá nohkan. Dronnet siđai sin vuordit go dáhtui gullat maid mun muitalin. Son dovdui berošteame viellja áššis, ja lohka Sámi leat alcces erenoamáš báiki máid máŋgii lea galledan. Son jearahii nu olu, ja mun geahččalin čilget buoremus lági mielde. Čilgejin movt min eatnamat rieviduvvojit, seammás go bohccot bákkuin njuvvojuvvojit. Sii hávkadit min ja jávistit min eallima ja kultuvrra.

– Logai go dronnet áigut veahkehit du vielja ja earáid dán dilis?

– In dovdda ahte mun sáhtán njuolgut gáibidit dronnegis maidege. Mun sahtan sutnje addit dieđuid, reaidduid, máid son sáhttá geavahit almmolašvuođas jus dan dáhttu. Ledjen vuosttažettiin čilgeme ja gaskkusteame min duohtavuođa dáidaga bokte, ja dronnet rabai šloahtta uvssaid ja suovai mu dan dahkat. In dieđe máid dronnet dainna dahká, muhto sus lea dál dáidda, diehtu, almmolašvuohta ja buot vejolašvuođat.

Jovsset Ánte Sara lei bággejuvvon njuovvat eanaš oasi ealus ovdal ođđajagi. Sara ii doahttalan stáda gáibádussii ja vuorddaša dál maid ON Olmmošvuoigatvuođakommišuvdnii cealká áššis.

 Guovvamánus rahppu Sonja dáiddačájáhus gos máŋga sámi dáiddára leat bovdejuvvon oassálastit. Máret Ánne “Spiral of the Pile” lea justa dalle Prahas ja čájehuvvo easkka geassemánus dronnega galleriijas.