Govven: Karl Alfred Larsen

Deaivvada dronnet Sonjain ihtin

Máret Ánne Sara lea bovdejuvvon gonagaslaš šlohttii ihttin. Son beassá dronnet Sonjain háleštit dáidagis ja maid duođalaš diliid birra. Dohko vuolgá son vuollegašvuođain muitalit iežas barggu birra ja maid čilget makkár dilis boazosámi bearaš eallá ja movt Norgga stáda bákkus áitá njuovvat Jovsset Ántte ealu.

ČÁLLÁN: Ánne Biret Anti

Loga eambbo dás

– In leat goassege oba jurdilange ahte šloahtas galggašin fitnat, muhto dan dilis mas mu viellja dál lea, de mun geahččalan dahkat visot maid sáhtán veahkehan dihtii, lohká Máret Ánne Sara, gii dál lea Oslos ráhkkaneame stuora ja gutnálaš dáhpáhussii.

Čálii reivve dronnegii

Ovdal juovllaid son bovdejuvvui oassálastit dronnet Sonja dáiddačájáhussii. Justa dalle lei su bearrašis hui lossa dili, go viellja Jovsset Ánte, gii ii birgen stáda vuostá Alimusrievttis, ii ožžon makkárge doarjaga Stuorradikkis. Vaikko son lei guoddalan duomu Ovttastuvvon Našuvnnaid olmmošvuoigatvuođakommišuvdnii, de ii dáhtton Norgga Stuorradiggi vuordit. Jovsset Ánte galggai bákkus njuovvat ealus, mearridii Stuorradiggi.

– Lei hui lossa áigi mis justa go dát bovdehus bođii. Stáhta ii beroštan ON:s, ii beroštan olmmošvuoigatvuođain ja guhkkin eret mis olbmuin. Lossa mielain čállen dronnegii ja čilgejin dili ja ahte mu dáidda, man dáhtui čájehit, ii leat čikŋan ja guoimmuheapmin. Dáidda čilge viellja ja min dili, makkár váikkuhusat dán áššis leat sihke villjii, servodahkii, ealáhussii ja sámi kultuvrii. Reivves bivden Dronnega gullat man birra dáidda lea ovdalgo bidjá dan galleriijai, čilge Máret Ánne.

Bovdejuvvui šlohttii

Šloahtta dieđihii Máret Ánnii ahte dronnet lea reivve persovnnalaččat lohkan ja ahte lea válljen bovdet Máret Ánne šlohttii.

– Álggus suorganin, ja dovden iežan hui balus. Dattetge dihten ahte ean galgga dušše gáfe juhkat ja dálkki birra hupmat. Mus lea dáidda ofelažžan ja dan vuođul human. Mu mielas lea stuora dáhpáhus ja hui mávssolaš ahte Dronnet háliida deaivvadit muinna ja ahte son guldala min dáidaga, dili ja ášši, lohká son.

 “Spirals of the Pile” -dáidaga dat lea Máret Ánne bovdejuvvon čájehit Dronnega galleriijas.

– Dát dáidda lea oassin Pile o´ Sápmi -prošeavttas, maid vuolggahin čalmmustahttit boazodoalu dili ja Jovsset Ántte dili. Dát dáidda ii leat čikŋan ja guoimmuheapmin, go mii leat oba duođalaš ja ilgadis dilis. Dáidaga ferte duođas váldit, go dat hupmá. Dat govvida bures Jovsset Ántte ášši ja maiddái Norgga stáda daguid. Dáidda lea dego morálalaš tráhppá. Don válljet lávkkut go bajás vai njiejat go. Erenoamážit stáhta lea dakkár dilis ahte fertejit árvvoštallat gorgŋotgo tráhpá ovdalii go njiedjat nugo dahke Stuorradikkis go fámuin ja bákkuin bággeje Jovsset Ántte čippiid ala. Dál lea áigi ahte stáhta jurdila. Jotket go duolbmut min rivttiid ja uhkidit min boahtteáiggi? Ja de in oaivvil dušše mu vielja, muhto olles boazodoalu, min eatnamiid, min rivttiid ja min boahtteáiggi.

– Mávssolaš signála go dronnet guldala

Máret Ánnes eai leat makkárge gáibádusat dronnegii.

– Válljen dulkot bovdejumi dainna lágiin ahte dronnet berošta sámi dáidagis, sámi servodagas ja sámi álbmogis, go lea bovden mu šlohttii ja danne go lea bovden mu ja eará sámi dáiddáriid čájáhussii. In dieđe maid dronnet boahtá lohkat, muhto mun ain juo jurddašan ahte deháleamos lea goit ahte son lea válljen guldalit. Maid son lohká in sáhte einnostit, inge sáhte vuordit ja gáibidit maidege sus. Munnje lea dehálaš ahte son beassá dovddadit sámi dáidagiin, ahte dat ii leat dušše čikŋan su šlohttii ja galleriijai, muhto ahte das lea čielga vuolggasadji. Dieđán ahte Gonagaslaš bearaš garvá politihkket, muhto lea mávssolaš signála ahte Gonagaslaččat válljejit guldalit ja addit saji dan áššái, Sápmái ja min váttisvuođaide.

Guovvamánus rahppo Sonja dáiddačájáhus, masa máŋga sámi dáiddára leat bovdejuvvon oassálastit. Máret Ánne “Spiral of the Pile” lea justa dalle Prahas ja čájehuvvo easkka geassemánus dronnega galleriijas.