- Lea oalle ironalaš ahte son dál dánsu ja ávvuda Mátta-Afrihkás Beyoncéin ja Nelson Mandela rohke eamidiin, dan botta go áigot jávkadit nuorra boazodoalli. Dássážii ii leat miehtan addit midjiide jearahallama. Govven: Kim Anders Vuolab

– Dánsu Beyoncéin dan botta go Jovsset Ánte gillá

Dan botta go Jovsset Ánte Sara doarru iežas deháleamos ášši ovddas Sámis, de lea Norgga stáhtaministtar Mátta-Afrihkás dánsume Beyoncéin ja viežžame dásseárvobálkkašumi.

– Dán jagi Global Citizen máilmmijođiheaddji -bálkkašupmi geigejuvvo máilmmi hágas Norgga stáhtaministarii, Erna Solbergii, dajai Graça Machel, Nelson Mandela rohke eamit go geigii bálkkašumi Solbergii. Bálkkašupmi juhkkojuvvui Nelson Mandela 100 jagi ávvudeamis, Johannesburgas. Solberg oažžu bálkkašumi iežas barggu ovddas, go lea nannen dásseárvvu, nu čállá VG.


VG ášši dasgo stáhtaministtar lea illudeame ja dánsume Mátta-Afrihás. 

Suhttadan redaktevrra

SÁMi ođasmagasiidna lea guhká oččodan stáhtaministara ságaide. Stáhtaministara kantuvra ii loga stáhtaministara sáhttit visot vástidit ja čujuha Eanandoallodepartementii. Eanandoallodepartemeanta ii maid sáhte maidege lohkat, ja čujuha Eanandoallodirektoráhtii.

– Eat mii leat doppe šat gullan maidege, ja seamma hal leaš. Stáhtaministara mun dáhtošin jearahallat. Lea oalle ironalaš ahte son dal dánsu ja ávvuda Mátta-Afrihkás ja oažžu dásseárvobálkkašumi. Beyoncé ja Nelson Mandela rohke eamit galggašeigga diehtit makkár plánat Norgga stádas leat Sámis. Sii áigot jávkadit nuorra boazodoalli, lohká Ánne Biret Anti, SÁMi ođasmagasiinna redaktevra.

Gáibida jearahallama

Gieldadepartemeantta sámeáššiid stáhtačálli Anne Karin Olli lei boahtán Sámedikki dievasčoahkkimii. Son ii loga sáhttit maidege lohkat ášši birra, go ii dovdda ášši eará go media bokte. Son šiitá iežas gohčohallan orrut jaska dán áššis.

– Attášin jearahallama jus dát livččii min departemeantta ášši. Go ii leat, de in sáhte, go ášši ii leat min hálddus ja mun in oba dovdda ge ášši, lohká Olli.

SÁMi ođasmagasiidna lea beaggán viidát go gáibida stáhtaministara beassat jearahallat. Sihke Medier24.no ja NRK Sápmi leat jearahallan redaktevrra.

– Lea hui vuogas ahte beaggá mo dilli lea Sámis. Min debáhtat šaddet álo beallemuddui go Norgga fápmoolbmot eai searvva jearahallamiidda. Stáhtaministtar ii sáhte dušše boahtit Sápmái mojohallat go leat illuságat. Son galgá maid váldit oasi váttes áššiin dáppe. Sus lea ovddasvástádus, lohká Anti.

Stáhtaministarkantuvra lea čállán Medier24:i ahte Norgga mediat leat hui duhtavaččat stáhtaministariin, go son dávjá searvá jearahallamiidda, maiddái báikkálaš aviissaide. Stáhtaministarkantuvra maid lohká departemeanttaid oaivilat leat stáhtaministara oaivilat, ja nu galggašii leat doarvái sin jearahallat.


SÁMi Ođasmagasiidna redaktevra Ánne Biret Anti čálii loahpas stáhtaministtara Facebooksiidui go ii oačču jearahallama.