Dáhttut čalmmustahttit čižžeborasdávdda Sámis

Čižžeborasdávdasearvi ja Miss Norway Susanne Næss Guttorm, gii mánnán massii eatnis borasdávdii, bargagohtet dál Sámis čalmmustahttit duođalaš buozalmasvuođa.

Jahkásaččat buohccájit Norggas sullii 3300 olbmo čižžeborasdávddain. Čižžeborasdávddasearvvis lea 16000 mielláhtu ja lea okta daid stuorámus buhcciidorganisašuvnnain Norggas.

Deaivvadit presideanttain

Sámis leat unnán mieláhtut ja searvvis iige leamaš áktánas doaimmat Sámis. Dál dáhttut bargagoahtit Sámis, ja lávvardaga deaivvadit Sámediggepresideanttain Aili Keskitaloin ja Sámi doavttersearvvi jođiheaddjin Máret Lájlá Nedrejordan Guovdageainnus. Nu čállá Čižžeborasdávddasearvi preassadieđáhusastis.

–Mii sávvat dát čoahkkin veahkeha min vai sáhttit ávkin Sámis. Mii diehtit čižžeborasdávdda birra hállat sáhttá leat váttis ja vaikko vel tabuáššin. Mii geahččat maid vejolašvuođa ásahit sierra sámi fierpmádaga, go min mielas lea dehálaš cegget buori arenaid, go ságastallan ja doarjja lea dehálaš sidjiide geat leat buozas, lohká Ellen Harris Utne, Čižžeborasdávddasearvvi stivrajođiheaddji.

– Dehálaš oččodit sámi arena

Sámediggepresideanta Aili Keskitalo lea hui duhtavaš go Čižžeborasdávdda searvi dál dáhttu sierra doaimmaid sámi borasdávddapasienttaide ja sin oapmehaččaid, go čižžeborasdávdá deaivida maiddái sámis.

 ­– Duođalaš buozalmasvuohta čuohcá garrasit sihke pasientii ja su bearrašii. Sámiin geain dát dávda lea, maiddái dárbbašit arena gos sáhttet háleštit earáiguin seamma dilis. Sii dárbbašit arena gos lea seamma kulturduogáš ja sámegillii, lohká sámediggepresideanta Aili Keskitalo.

Miss Norway veahkkin

Dán jagá Miss Norway, Susanne Næss Guttorm, galgá leat Čižžeborasdávdda ovddasteaddji. Dasa lassin go son lea sápmelaš, de son maiddái ovddastan hui dehálaš joavkku, namalassii nuoraid.

– Borasdávda ášši lea dehálaš munnje. Ledjen njeallje jahkásaš go massen eadnán borasdávdii. Mu sávaldat lea ahte ii oktage mánná galgga dárbbasir eatnis dahje áhčis borasdávdii. Jus sáhtan vaikkuhit nu ahte sámis boradávdda pasienttat ja oapmehaččat ožžot buoret fálaldaga, de lean giitevaš, lohká Næss Guttorm gii maiddái searvá dán čoahkkimis.