Govva: This Is Treaty Land.

Dáhttu Canada vuhtiivdit Wet´suet´en álbmoga vuoigatvuođaid

Norgga Sámiid Riikkasearvi dáhttu Kanada stáhtaministara Justin Trudeau vuhtiiváldit eamiálbmotvuoigatvuođaid ja bissehit veahkaválddi, mii dáhpáhuvvá Wet´suwet´en aktivisttaid vuostá.

– Mii váivašuvvat go Kanada eiseválddit fámuin váldet min oappáid ja vieljaid, lohká NSR jođiheaddji Runar Myrnes Balto.

NSR lea rabas reivve čállán Kanada ambassádii maŋŋel go Kanada politiijat mannan vahku fámuin gevreje Wet´suwet´en aktivisttaid, geat ledje gidden geainnu vuosttildan dihte Coastal GasLink gássarevrre huksemiid British Columbias.

– Govat, maid mii leat oaidnán, eai atte doaivaga olmmošvuoigatvuhtii ja soabadeapmái, go vearjuduvvon politiijat fallehit ráfálaš eamiálbmotaktivisttaid. Mii dáhttut stáhtaministara ja Kanada eiseválddiid doahttalit aktivisttaid olmmošvuoigatvuođaid ja Wet´suwet´en-álbmoga rievtti iešmearrideapmái, lohká Balto.

Sámediggeráđđi lea sádden ráđđehusšiehtadallamiidda listtu áššiin, maid dáhttot bellodagaid váldit mielde ođđa ráđđehusjulggaštusas. 

– Go Gurutbellodat bođii ráđđehussii diibmá, de viimmat dáhtto máttasámi kulturviessu Saemien Sijte hukset. Go Risttalaš álbmotbellodat dál lea ruovttoluotta ráđđehusas, de jáhkkit barggu ovdánit ja ahte ráđđehusas leat eanet sámepolitihkalaš áigumušat, dadjá Sámedikki presideanta Aili Keskitalo preassadieđáhusas. 

Son čujuha ahte Bondevika 2-ráđđehusa áigge, mas ledje mielde Risttalaš álbmotbellodat, Olgešbellodat ja Gurutbellodat, de ásahuvvui finnmárkkuláhka, konsultašuvdnaprosedyrat ja sámi ofelaččat -prošeakta álggahuvvui. 

– Mis leat ain ollu gáibideaddji áššit, mat gusket sámiide, ja mis leat čielga vuordámušat ahte ođđa ráđđehus buktá positiiva bohtosiid midjiide sámiide, cealká Keskitalo loahpas.

Finnmárkku fylkkagielda mearridii ovddit jagi addit lobi luossa-, dápmot- ja girjeluossabiebmamii Vebovttus, Davvenjárgga gielddas. Lobi váide Sámediggi, Heidi Persen ja Ingunn Utsi. Sámediggi cuiggodii go eai leat vuhtiiváldán ahte guovlu lea deaŧalaš mearrasámi guovlu. 

Guolástusdirektoráhta hilggui Finnmárkku fylkkagieldda mearrádusa ja oaivvilda earet eará ahte Finnmárkku fylkkagielda ii leat vuhtiiváldán erenoamáš suoji, mii sámiin lea álbmotrievtti mielde. 

– Mun registreren ahte Guolástusdirektoráhta bidjá deattu erenoamáš ovddasvástádussii, mii Norgga eiseválddiin lea sámiid guovdu. Dainna lean hui duhtavaš. Ohcan sáddejuvvo Rogalándda fylkkagildii ođđa meannudeapmái ja Sámediggi áigu čuovvulit ášši viidáseappot, dadjá sámediggeráđđi Silje Karine Muotka, preassadieđáhusas.

Emneord: