Anne Karin Olli, Norgga Gielda- ja ođasmahttindepartemeantta stádačálli ja Gieldaministtar Monica Mæland leaba ovdal juo geažuhan giellajahkái lassi juolludemiid. Dál árvalit 1,1 miljovnna ruvnno čalmmustahttit eamiálbmogiid giellajagi. Preassagovva

1,1 miljovnna ruvnno čalmmustahttit eamiálbmotgielaid jagi

Ráđđehus lohpidii gieskat SÁMi ođasmagasiinnas vuoruhit eamiálbmogiid giellajagi. Stádabušeahta olis Ráđđehus árvalage 1,1 miljovnna ruvnno Sámediggái čalmmustahttit Riikkaidgaskasaš eamiálbmotgielaid jagi 2019.

– Lea buorre go ráđđehus juolluda ruđa Sámediggái giellajagi bargguid ovddidit ja čalmmustahttit, muhto mus lea vuordámuš ahte ráđđehus ieš maid aktiivvalaččat bargá eamiálbmotgielaid seailluhemiin, dadjá sámediggepresideanta Aili Keskitalo.

Ráđđehus geažuhii bušeahta

Ovttastuvvon Našuvnnat lea mearridan ahte 2019 lea eamiálbmogiid giellajahki čalmmustahttin dihte gielaid, ja veahkehan dihte gielaid seailut. Dálá birrasiid 7000 gielas leat sullii 2700 giela áitojuvvon. Eanaš dain dáidet leat eamiálbmogiid gielat.

Anne Karin Olli, Norgga Gielda- ja ođasmahttindepartemeantta stádačálli ii dáhtton gieskat vel almmuhit mii bušeahtas boahtá, muhto logai dalle ahte Ráđđehus oaidná giellajagi dehálažžan.

–  Ráđđehusas lea dáhttu nannet sámegiela, ja mii dáhttut buriid giellanjuolggadusaid, mat leat heivehuvvon dálá servodahkii. Mii leat Váibmogiella-prošeavtta vuoruhan, ja čuovvulit dan, dat lea dehálaš Ráđđehussii, logai Olli gieskat.  

Beassá čađahit gielladoaimmaid

Sámediggepresideanta Aili Keskitalo oaidná dál vejolažžan čađahit doaimmaid giellajagis, go liigejuolludeapmi bođii.

– Giellajagis dáhttut sihkkarastit bistevaš doaimma Sámi giellagáldui ja oažžut stuorát aktevrraid mielde čoavdit hástalusaid, mat eamiálbmotgielain leat giellateknologiija ja digitaliserema oktavuođas. Sámediggi maiddái lágida stuora giellakonferánssa, gos áigut čalmmustahttit sihke Riikkaidgaskasaš eamiálbmotgielaid jagi ja Sámedikki giellaloktenstrategiijaid. Konferánsa šaddá viiddis, ja áigumuš lea maid bovdet eará eamiálbmogiid Árktalaš guovllus konferánsii.

 

Emneord: