NRK1žis váldon šearbmagovva

Vuite MGP - Dál dollejit Israelii

Fred René Buljo ja KEiiNO vuittii Norgga Melodi Grand Prix loahppagilvvuid ja ovddastit Norgga Israelis Eurovision Song Contestas.

Hirbmat ealas lei go Fred René Buljo ja KEiiNO joavku bođii lávddi ala. KeiiNO leamaš čielga fávorihtta dáid maŋimuš beivviid ja nu vuite ge odne Norgga Melodi Grand Prix loahppagilvvuid. Oslo Spectrumas oidnoje dievva gávttehasat.

Dan botta go eanaš riikkat, geat ledje bovdejuvvon jienastit Norgga Melodi Grand Prix loahppagilvvuin, jienstaedje buot eará go KEiiNO, de joavku vuittii álbmoga jienaid. Maiddái Israel jienastii KEiiNO. D`Sound oaččui eanemus jienaid riikkaid juryain, muhto dat ii doallan. 


NRK preassagovva: Julia Marie Naglestad  

Earet Fred René Buljo de lea KeiiNO joavkkus Tom Hugo ja Alexandra Rotan. Fred René Buljo lea Guovdageainnus eret ja lea lávlu Duolvaduottar joavkkus.

Guovdageainnu sátnejođiheaddji Johan Vasa lei MGP doaluin. Sámediggi ge lei guossin Oslo Spectrumas eahkedis. Sámedikki ovddastii sámediggeráđi Henrik Olsen. 

Ovdal gilvvuid sihke sátnejođiheaddji ja sámediggeráđi láhttu Facebook bokte ávžžuheigga sámiid jienastit KEiiNO ja luođi.

– Lean gearggus lávlagii Spirit in the Sky KEiiNOin. Muitet jienastit, čálii Olsen gii lei leavgga vel váldán mielde. 


Henrik Olsen Facebook siiddus.